LU SCARPARU TE LU TIAULU di Franco Candido

Cap. VIII (Parte D)

 

Mesciu Giuanne a conclusione se turnàu te retu.

  • Ma ce sta dici? – li tisse pigliannulu pe’ nu razzu. – àzzate e nu fare lu fessa!

  • None, te veru sta dicu! – schiddràu lu condottieru te Luciferu sempre cchiù stizzatu. – Anzi sai ce te ticu: tirame lu razzu cchiù forte ca, fra tutti e ddoi, pote éssire ca nci la facimu ne lu tiramu! Tira! Tira!

  • Sta tiru! Sta tiru! – tisse iddhru tirannuli lu razzu cu tutta la forza. – Ma nu bete ca sta me pigli pe’ fessa, no? Nu bete ca oi cu rriamu tardu cu faci se stizza patrunuta, no? Ca te nu tiaulu furbu comu a tie nc’ete te le spetti te tutte!

  • None! None! Ce fessa e fessa! Aggiu ncuddhratu te veru e se nu me ne scoddhru te pressa e nu ne sbricamu, quannu rriamu allu nfiernu, ci sape quante ne li tae patrunuma, a mie e a tie, se rriamu puru cu nu minutu te ritardu! – tisse Asterutte sperannu cu lu mpaura e cu lu pozza chiutare. Ma Mesciu Giuanne, invece cu se mpaura, lu pigliàu pe’ corne e ncignàu ne le tira cu na furia ca nu s’ìa mai ista.

  • Scoddhrate! Scoddhrate! – li critàu tirannu cu tutta la forza ca tinìa. – Lassa lu saccu! Ciamune ! Iti ca se me faci rriare tardu e faci se la piglia cu mie lu caputiaulu te la fazzu pacare. Iti ca su bonu e caru, ma se me stizzu te fazzu bitire chieu na cosa! – e mentre ticìa cussì li tiràu prima na corna e poi l’aura e dopu ancora le zziccàu tutte e ddoi te paru e tiràu comu nu pacciu; poi, li mpizzàu nu cauce intra lu panaru comu sia cu lu convinca megliu, ma senza nuddhru effettu. Ddhru furmine te tiaulu sempre an facce allu saccu rimanìa ncuddhratu.

  • Ahi! Ahi! Lassame le corne ca sta me ne le scoddhri cu tutta la capu! Tirame pe’ razzu megliu, ca nu me togliu! Ahi! Tiscraziatu! Se me ene la fatta, iti ce te cumbinu!

Mesciu Giuanne, ormai, sta se mpegnà lu tira cu tutte la forza soa; nu picchi lu piglià pe’ lu razzu, nu picchi lu piglià pe’ le corne, nu picchi parìa ca ulìa ne li scoddhra la capu; alla fine, lu pigliàu pe’ cuta e ncignàu li tira forte forte puru quiddhra.

  • None! Pe’ cuta none! – schiddràu Asterutte tuttu mpauratu. – Fermu, cu nu sia me ne la scoddhri! Nu me tirare te ddhrai ca te crapune me faci ddintare crapa! Fermu! Fermu!

Lu mesciu nosciu, però, ormai s’ìa nfervoratu. Se cuardàu te coste, itte n’arulu te ulìa, scucchiàu na stanga bella crossa e ncignàu te lu tanganiscia bonu bonu.

  • Nnu mboi te ne scoddhri!? – li critàu mentre li ssittà nu corpu te mazza sulla frunte giustu a mienzu alle ddo’ corne. – E mo’ te fazzu bitire chieu na cosa! – e ne li ssittàu n’auru an capu fermu fermu, ca se ntise comu nu rumore siccu e curtu ca parìa ca ìa spaccatu quarche ossu te quiddhri boni. – Nah, ce te pigli! Auru ca l’anima! Nah! Tiaulu furbu! Nah! Tiaulu fessa! E ne ogliu te tiauli comu a tie! Nu nc’era ceddhri auru cu me mannane cu me ne porta l’anima? Ca tie, addrù te presenti? Asterutte te chiami? Te osci annanzi “Cornerutte” t’hane chiamare, si fessa tie! Nah! Ce te pigli! E tieni quistu! E tieni st’auru!

  • Basta! Basta! – critàu alla fine Asterutte cercannu cu scansa ddhra furia te cristianu comu megliu putìa. Se spustà te quai, se spustà te ddhrai, lu saccu però lu tinìa ncuddhratu an terra e pe’ quantu lestu se cutulà, nu riuscìa cu se ripara te li corpi ca li rriàne te tutte le parti senza se ccorga te ddhrune. La mazza lu cuglìa tuttu te paru an capu, sulle spaddhre, sulle razze, sull’anche, sulli zocculi, ca ormai scrufulàne an terra pe’ lu sangu sou stessu, ca li culà te le ferite ca li aprìane li nuti te lu taccaru. Lu famosu tiaulu condottieru ìa ddintatu ormai nu gnommaru rrinnutu sutta li corpi ca li tìa lu mesciu comu nu timoniu scatinatu.

  • Sta me cciti! Basta! Lassame! Sta me cciti! Nu tieni core? – li crità ddhru poru tiaulicchiu. Lassame stare cu me n’au! Lassame stare ca fazzu finta ca nu te canuscu! – ma se ffrancà cu parla, la mazza cìa e binìa te sulle spaddhre soi ca l’ìa fatte a sangu. – Basta! Basta ca te tau teice anni auri puru chieu! Lassame ca te tau teice anni auri te vita e quanti sordi oi! Ahi! Ahi! Fermate!

Finarmente, la mazza se fermàu. Mesciu Giuanne lu cuardàu cu ddhr’attrezzu terribile mpisu a menz’aria e cu nu sguardu cchiù bruttu te nu timoniu spiritatu e, cu nu fare seriu seriu, li tisse: – None teice anni auri m’hai ddare, ma tanti quanti ne ogliu! Anzi, aggiu bèssire chieu ca decitu quannu me n’aggiu binire. Ce me dici? Te ae bona comu idea?

  • Sine! Sine! Te tau quanti anni oi, basta ca me lassi stare!

  • E te sordi, quanti me ne tai? – lu dimannàu ntorna lu mesciu azzannu la mazza.

  • Quanti ne oi! Quanti ne oi! Ci cu te steciane le paute sempre chine te quanti furmine te sordi oi! Ci cu nu te ne possi mai inire allu nfiernu! Quistu te dichiaru e te lo firmu puru an doppia copia!

  • Ah! Moi ragionamu! Abbatine, allora! Spunna cchiù sutta ca poi e dinnela a patrunuta ca ete inutile me manna auri tiaulicchi comu a tie ca lu pattu stae ormai firmatu e ci ene ene lu ndilessu come aggiu fattu cu tie! Hai capitu? Nah, firma!

  • Sine! Aggiu capitu! E ci ete tantu pacciu begna chiùi!

E cussì foi ca Mesciu Giuanne pigliàu pe’ fessi tre tiauli, li binchiàu te mazzate, se cutìu la vita pe’ quanti anni ose e campàu tantu riccu e rispettatu ca fice puru quarche opera te bene sulla terra e sempre, ogne annu, fice festa cranne alli Santi Martiri, ca erane li Santi cchiù potenti ca sapìa, percene ìane resistitu alle tentazioni te li musulmani, alle tante tentazioni te lu timoniu e a tutte le malefatte soi.

(continua crai)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s