LU SCARPARU TE LU TIAULU di Franco Candido

Cap. XI (Parte B)

QUANNU MESCIU GIUANNE DINTAU RICCU

Ma quiddhra nienzi, sai? Nu se nfacciau filu. Ma pe’ l’éssire, comu facìa se nfaccia se n’auru picchi l’ìa tatu corpu te sangu quannu ìa ntisa la uce te maritusa propriu mentre sta bbacà lu sangunazzu intra lu piattu te l’uccieri te lu paise?

  • Ntonietta! Sentisti? – critàu ntorna lu massaru ca intantu ìa ciutu trasa la ciuccia intra la staddhra cu la curtìa. Quantu era crossu ddhru cristianu! Ce omu! Autu cchiui te ddo’ metri, na spaddhra te nu giacante, le razze unchiate te musculi, ca se cutulàne a nanzi e arretu ogni cosa ca piglià, nu panzune ca trimulà ogni passu ca facìa, sutta la cannottiera te lana fatta allu talaru, na puzza te suturi ca rià finanche sullu ntaulatu, addrài ca m’ìa scusu chieu. Ce t’aggiu dire? N’omu fattu pe’ bitire!

  • Ntonietta! – critàu ntorna. – Voi veni vidi sta’ ciuccia? Sine o none?

Chieu nu sapìa ce ìa fare. Te na parte timìa me fazzu bbitire cu nu sia me scuscina te mazzate, te l’aura, itìa ce sta cumbinàne quiddhri intra la cucina e me inìa cu li ncusu a dr’omone. Mentre quiddhru cìa e binìa intra la staddhra cu giusta la ciuccia e lu birocciu, quiddhri se nmannisciara cu scunnane la carne te porcu intra lu furnu, lu sangunazzu intra lu quatarottu sutta lu focalire, la crostata intra lu stipu, lu mieru intra la capasa te le friseddhre, copertu te na tuaglia, la pezza te casu sutta na mappina, li piatti e le furcine intra la pila. Mo’, lu massaru ìa spicciatu cu conza le cose soi intra la staddhra, ma quiddhri ancora sta sistemàne le cose loru intra la cucina e muglierasa ancora nu bissìa.

  • Beh! Ntonietta! Ma sta dormi? A ddhru furmine stai? – critàu ntorna quiddhru. – Bah! Aggiu vidìre propriu ce sta face! – tisse alla fine e ncignàu saglia la scala te lu ntaulatu, addhrai ca m’ia scusu chieu.

  • Sorta mia! – pinsài. – trittu a quai sta bene! Mo’ me ccite! – E me itti persu. Cuardai quiddhri intra la cucina e bitti persi puru iddhri. Quiddhru sta salìa e nui stemmu icini cu ne ciamu all’auru munnu.

  • Iioohhh! Iioohhh! – fice la ciuccia. – Iioohhh! Iioohhh!

  • Citta Rosetta! – fice lu massaru. – propriu moi hai ragliare? – e se fermàu cu cuarda la ciuccia.

Nu sacciu comu foi ca propriu tannu me inne la fatta cu ticu a quiddhri te lu finiscieddru:

  • Uhé! Ui ddoi, scunnìtibu! A qua subbra sta bene! Sbricatibu!

Iddhri me cuardara sia ca ìane istu nu tiaulu e scaranfulara l’occhi. L’uccieri te lu paise ncignàu fua an tunnu intra la cucina, tuttu mpauratu, ca sapìa ca lu massaru nu lu putìa bitire pe’ certi cunti ca ìane rimasti an sospesu tra tutti doi e ca nu ìane mai stati pacati. La Ntunietta, invece, capìu te pressa ce ìa fare; lu fermàu, lu zziccàu pe piettu e li fice segnu cu trasa intra la mattrabanca ca se apriu a cuperchiu comu nu chiautu. Iddhru stìa mpalatu pe’ la paura, ma iddhra lu spinse an forza a ddhra intra propriu mentre lu massaru mise lu pete sullu ntaulatu. Comu se nfacciàu te lu finesciu itte muglierasa sittata alla banca cu la ttaccaglia a manu, seria seria, ca sta li giustà li cuasetti.

  • Ntonietta! Li critàu. – Ma non senti quandu te chiamu?

  • Ehi! Ce caleddhru lu maritu miu! Rrivasti? Già, quai stai? None! Non ntisi filu! Te ne vinisti prima? Nah! Menu male!

  • Sine! Appena vitti la Rosetta me ne ‘namurai. Veni intra la staddhra ca la vidi. Non avìa ciuccia cchiù beddhra te iddhra a tutta la fera. Mmanisciate! Veni!

A ddhru puntu, se giràu e me itte.

  • Uhé! – tisse. – E tie ci sinti? Ce sta faci a quai?

  • Bongiorno! – tissi cu na riverenza. – Sta cercu fatìa e siccomu allu paise m’ane tittu ca signuria sinti lu massaru cchiù riccu e cchiù giustu pe’ centu miglia e passa te qua nanzi, ìa inutu cu biciu se te serve na manu pe’ lu granu, pe’ la zappa o pe’ le estie, ca chieu le fatìe ca se facune a fore le sacciu fare tutte e me cuntentu te na paca te nienzi.

  • E comu mai t’hai scusu a quassusu? Uce non tenivi cu dumandi muglierama?

(continua crai o nu giurnu te quisti quai)

Advertisements

LU SCARPARU TE LU TIAULU di Franco Candido

Cap. XI (Parte A)

QUANNU MESCIU GIUANNE DINTAU RICCU

  • Quannu me ne cii an cerca te furtuna, nu me spittàra filu le caruse all’issuta te lu paise, ca s’ìa spasa la uce ca chieu ìa dintatu puarieddhru cchiui te iddhre e quiddhre me scanzàne percé nu se ne facìane nienzi te unu comu a mie senza arte né parte. Cussine, camina camina, passài paisi e massarie, campi arati e chisure nicchiariche, boschi e fureste ca te mpaurai puru passi; li pieti s’ìane fatti a sangu pe’ quantu caminà e quannu sciaccà, minà lu saccu sutta n’arulu e me stinnìa a ddhra subbra cu dormu, sciaccu e mortu. Ìa ddintatu siccu siccu ca mangià picchi e filu e quannu truà n’arulu te mile o te pire facìa festa; cia tuttu lurdu, ca nu me putìa mai llare e dhre robe ca tinìa subbra, ca ìa ddo’ misi, s’ìane tantu strazzate e rrinnute a pezza nfitisciuta ca puru li cani me scanzàne, nu sulu li cristiani.

Nu bellu giurnu rriai a na massaria ca chiamàne “l’Acchiatura”, icina a Martanu, e trasii cercu fatìa o armenu na calata te pane cu mangiu. Issìu la massara, cu n’aria tutta sufisticata, li musi tinti, comu sia ca era la megliu signura te Lecce, me cuardàu mancu ca tinìa la rugna, e disse te lu largu, senza me tecia tiempu parlu: – Marituma non l’ave! Qualunque cosa voi nu su cose ca me poi tire moi! Torna quandu vene quiddhru ca tengu l’ordine cu nu apru a nisciunu! – e dittu e fattu sbattìu la porta tantu forte ca n’anta se ne issìu te lu stàntulu. – Toccu, ce be cresta! – pinsài e a stienti fici a tiempu li critu lestu lestu: – Ehi, signura! Ca chieu na stozza te pane ogliu none nu pranzu! Aprime! –

– Vanne cu lu Signore, vanne! – rispuse iddhra e giràu ddo’ fiate la chiai intra la serratura cu chiua megliu la porta. – Ma cuarda ce gente! – dissi suttauce, ma nu me ne cii. Stìa troppu sciaccu e troppu mortu te fame cu me mintu ntorna la strata sutta li pieti.

  • Assa bitumu se nc’ete n’ou, armenu! – pinsài, sicutannu na caddhrina ca azzà e bascià la capu te nanzi a mie. Ne truai ddoi te oe e me le calai una arretu all’aura. Poi, me stisi su nu ntaulatu chinu te paglia e chiusi l’occhi me ddifriscu. Tuttu te paru, però, ntisi nu sbattire te la porta e la risatella te la signura ca tìa lu benvenutu a nu cristianu.

  • Avanti! Avanti! Me critìa ca nu veni filu! – tisse quiddhra fra na risatella e l’aura. – Ce portasti de beddru?

  • Ddo’ costate de porcu cu rustimu e nu stozzu te sangunazzu ca fici sta’ matina prestu, quandu ccisi lu porcu. – rispuse iddhru cu na certa importanza. – Marituta l’ave? Ca se no me ne vau!

  • None! Non l’ave, poi stare tranquillu! Ciu alla fera cu se catta na ciuccia nova ca quiddhra ca tenìame schiattàu la simana passata. Veni! Trasi!

  • Hai capitu la massara! – pinsài. – A mie nu me putìa aprire, ma alla carne te porcu sine!

Però, la cosa se facìa interessante ca nc’era te mienzu carne rustuta e sangunazzu e chieu, ca nu mangià ca ìa tre giurni, me ntisi fiaccu sulu cu nci penzu. Sullu ntaulatu, nc’era nu finiscieddhru ca tia intra la cucina e te ddhrai se sintìane le uci loru ca ritìane e scherzàne e puru ca nu capìa tuttu quiddhru ca ticìane, però, itìa tuttu quiddhru ca facìane. Cussine, itti iddhru ca dumà lu focu cu rusta lu porcu, iddhra ca giustà la taula, ca caccià li piatti cu sparta lu sangunazzu, ca piglià li bicchieri e nu bellu buttiglione te niurumaru, na pezza te casu friscu, na bella puccia, na crostata ca ancora fumà; insomma, te fronte a tuttu ddhru bene te Diu, chieu sta me sintìa murire. A nu certu puntu, però, mentre ca sta mintìane intra li piatti lu sangunazzu e ddhra carne rustuta cu nu ndore ca me trasìa trittu trittu intra lu nasu, eccu ca ntisi lu rumore te le rote te nu birocciu e na uce te tronu ca chiamà:

  • Ntonietta! Ntonietta! Oh! Ieu suntu! Rrivài! Veni ca vidi la ciuccia nova! Veni! Mmanisciate!

(continua crai o nu giurnu te quisti quai)

LU SCARPARU TE LU TIAULU di FRANCO CANDIDO

Cap. X (Parte B)

MESCIU GIUANNE CAMPAU CENTU ANNI

 

  • None, Maria mia! Nu béssire cussì scucitata ca alla vita te na cosa sula putimu éssire certi e sai te quale? Te quannu nascimu, ca te quannu murimu la sape sulu lu Signore!

  • Ete veru! Ma tie hai pigliati pe’ fessi tre tiauli te li megliu!

  • Già! Ma percène m’ìa fatte le grazie Gesù Cristu quannu inne mangia a casa noscia cu San Pietru! Nu te ricordi? Me fice la crazia te la seggia, te lu piru e de lu saccu, se nu ìa uti ddhri miraculi a quai stìa chieu?

Mesciu Giuanne cutulàu la capu e se azzàu bàcia piglia ddo’ taccari te l’ortu cu conza lu focu ca sta se stutà. A ddhri tiempi facìa teveru friddu e ci nu tinìa nu picchi te focu ddumatu intra casa, te notte putìa pure rimanire friddu mpalatu sutta le cuperte e prontu se n’acia all’auru munnu.

  • Però, prima rria l’ura, – fice ntorna iddru. – t’aggiu propriu gliare nu tisiteriu ca nu t’aggiu mai cacciatu. Ogliu te ticu propriu comu aggiu fattu cu fazzu li sordi te giovane prima me canusci.

  • Ah, finarmente! Eh, stu fessa! E tantu nci ulìa! Timme! Timme, prima cangi capu!

  • Allora, hai sapìre, ca quannu chieu era carusu, me chiamàne Giuanninu Scarparieddhru, forsi percène nu su statu mai mutu autu, e mauma, cu nu me lassa a mienzu la strata, me mannà a Mesciu Itucciu, lu megliu scarparu te Otrantu, quiddhru ca rriàu li fazza le scarpe puru a Papatore! Lu mesciu nu bera fiaccu cu li cristiani, e mancu cu mmie, e lu mestiere chianu chianu sta me lu mparà te veru, ma patrunusa, ddhru riccone spunnatu te Don Giggi, tirchiu te comu era, ulìa cu li pacu l’usu e lu cunsumu te lu mesciu ca fatià intra la rimesa soa e me tisse chiaru:

  • O me pachi a sordi o hai fatiare pe’ mie! La tuminica l’hai fare le scarpe a tutti li mmassari mei, ca pe quantu fatìane la simana, me cunsumane cchiù scarpuni iddhri, ca te tutti li zocculi te li cavalli misi nsieme.

E chieu, ca sordi nu ne tinìa, ncignai a fatiare pe’ stu lampu te cristianu puru lu sabatu bespira e la tuminica, e nu rrià cu giustu nu scarpune ca me ne purtàne te pressa n’auru, cchiù scuncignatu te quiddhru te prima, e pe’ le scarpe mei nu nc’era mai tiempu. Però, dopu ddo’ anni ca cìa annanzi e a retu cu sta storia, nu bellu giurnu me provai li scarpini te Don Giggi, ca l’ìa fatti te pelle te crapettu, e quannu itti ca parìa nu signurinu puru chieu, me ne issii alla chiazza e, se oi nci criti se no sia, me ccorsi ca le caruse te lu paise, ncignara me cuardane, cu russiscane e cu bàsciane la capu vergugnuse. La cosa ncignàu me piazza; ddoi erane le cose: o me cuardàne percène me truàne beddhru o me cuardàne percène se critìane ca ddhri scarpini, luciti luciti, erane mei e se pinsàne ca chieu tinìa li sordi. Cussì quannu me ne turnà a casa te la fatìa ncignai cu critu:

  • Ah! Ce su commuti li scarpini mei! Ce su commuti li scarpini te caprettu mei! Comu fazzu le scarpe chieu nu le face ceddhri!

Le caruse ncignàra se òtane cchiui te prima quannu passà. Le scarpe noi facìane “Scrii-cri!; Scrii-cri!” quannu camminà e, sarai ca pe’ stu frattieddhru, me sintìane rriare te lu largu e me spittàne alla trasuta te lu paise, annanzi allu puzzu nou, ci cu na ozza a manu, ci cu na sarcina te leune an capu, giustu fàzzane finta ca sta facìane quarche cosa. Don Giggi ncignau se ngelosisca te ste attenzioni ca tinìane pe’ mie e na sira, mentre sta me glià li scarpini soi cu li mintu a postu, inne intra la rimesa a panza annanzi e me tisse chiaru e tunnu:

  • Sienti Giaunninu, m’hane tittu ca hai critannu ca li scarpini ca chiessi alla chiazza suntu toi e none mei. E sta cosa nu me piace. Tie nu poi cire caminannu cu li scarpini mei ticennu ca suntu toi. Tie poi caminare sulamente cu li scarpuni toi, te coiru te ciucciu, e none cu li mei, te pelle te crapettu! Iti ca se me ticune ca t’hane istu ntorna cu li scarpini mei te li glieu e te glieu puru la rimesa ca fatii!

  • Eh, quante storie! Pe’ nu scarpinu annanzi a rretu! Comunque, va bene! Chieu me l’aggiu provati e aggiu tittu ca su mei, cussì pe’ dire!

Lu giurnu dopu però, invece me mintu li mei, me misi ntorna li soi e invece me stau cittu, me misi a critare ancora cchiù forte:

  • Ah! Ce su beddhri li scarpini mei! Ah! Ce su beddhri li scarpini te crapettu mei! – e le caruse nu te ticu comu me cuardàne e quante me spittàne, ma Don Giggi nu me la fice passare liscia.

  • Nu boi capisci allora! – me tisse la sira stessa tuttu russu an facce. – Tie nu hai dire: Ce su beddhri li scarpini mei! Tie hai critare, se propriu oi: Comu suntu beddhri li scarpuni mei, te coiru te ciucciu! Ca li scarpini te crapettu suntu mei e li cristiani nu s’hane filu pinzare ca tie sinti lu riccu e chieu lu puarieddru. Iti ca se criti ntorna ca li scarpini mei suntu toi, te glieu li scarpini mei e quiddhri toi e te bruciu puru la rimesa!

Mo’ tie ormai me canusci, poti mai pinzare ca chieu me m’paurà te ddhru panzune? Mancu pe’ la capu! E lu giurnu dopu critài ancora cchiù forte, pe’ tispettu:

  • Ah! Ce su beddhri li scarpini mei! Ah! Ce be delicata sta pelle te crapettu! – e quiddhru nu nci itte cchiui e mentre chieu me truà cu le caruse ca m’ìane nvitatu a nu ballu, iddhru cìu intra la rimesa, tagliau li scarpuni mei, ca li soi nu li truau ca li tinìa chieu, e mise focu alla rimesa. Addhrai t’ìi truare mo’ quannu turnài. Ce spettaculu se presentàu te nanzi all’occhi mei! Li scarpuni bruciati, ca sulu quiddhri tinìa, li fierri tutti minati a ddhra mienzu, la banchiteddhra scasciata, lu treppieti ruttu, lu martieddhru senza manicu, le siminzelle sparpagliate pe’ tutta la rimesa e le sole te coiru te ciucciu bruciate. Ah, quantu me la chiansi ddhra pora fatìa ca ìa persa. Nu m’ia rimastu propriu nienzi; ddhru furmine te cristianu ìa bruciatu tuttu.

  • E ce facisti poi? – dimmannau la Maria ca sta se appassionà allu cuntu.

  • Eh, ce fici?! E ce ìa fare? M’ìa rimastu sulamente stu saccu, lu martieddhru, quattru chioi e li scarpini soi, ca misi a ddhra intru cu nu li cunsumu; me lu minài sulle spaddhre e me ne ci an cerca te furtuna ca oramai nu m’ìa rimastu nienzi. Però, a ddhru me ne ci te la cuntu crai ca ormai s’ha fattu tardu e bete ura scià durmimu, ca sarai ca lu mieru ca m’aggiu biutu m’ha mpannatu e sta se chiutune l’occhi.

(continua crai o nu giurnu te quisti quai)

LU SCARPARU TE LU TIAULU di Franco Candido

Cap. X (Parte A)

MESCIU GIUANNE CAMPAU CENTU ANNI

Mesciu Giuanne scuse lu contrattu ca ìa firmatu cu Asterutte sutta na’ chianca te lu focalire e cuminciau se cota la vita megliu e cchiui te prima. Li sordi ca l’ìa tati l’urtimu tiaulu però nu putìane éssire eterni cussì comu nu putìa éssire eternu iddru, ca sta fiata, la sapìa, quannu ddintà ecchiu tuccà se n’àcia all’auru munnu, percène nu nc’era nuddhru auru tiaulu cu pozza pigliare pe’ fessa, cu lu fazza campare teice anni te cchiui, e mancu tinìa la bacchetta magica cu lu pozza ringiovanire. Perciò, ogni tanti anni se ricurdà ca te purule era e ca purule ìa ddintare prima o poi, scuperchià la chianca, piglià lu contrattu e ne lu liggìa a muglierasa cu li spieca bonu ce ìa statu capace fazza cu ddhru cervieddhru finu ca tinìa.

  • Uhé, Maria! – li ticìa tuttu priciatu. – Ma hai capitu ce aggiu statu capace fazzu? Aggiu pigliati pe’ fessi trete te li cchiù tristi tiauli e l’aggiu struncuniciati boni boni. Ma lu bellu ete ca nu sulamente tutti e trete m’ane lassatu campu trenta anni te cchiui, ma m’ane puru chinu te sordi, te fama e te onori. Mo’ te rendi contu ce furtuna hai uta cu te nzuri cu mie?

  • Sine, ete veru! – tisse, alla fine, la Maria nu picchi risentita. – Ma nu te antare tantu ca se nu nc’ìa stata chieu cu li fazzu lu cafè a ddhru primu tiaulu ca ncuddràu alla seggia, quannu mai li pututu binchiare te mazzate tie? E quannu mai t’ìa lassati teice anni auri cu campi e cu struncunici puru ddr’auri ddo’ timoni?

  • Già, m’ìa scerratu ca ete tuttu meritu tou! – fice iddhru mentre scunnìa ntorna lu contrattu tiabolicu sutta alla chianca. – Comu ncoddhri li buttuni alla mmerza tie nu li ncoddhra ceddhri, mancu lu tiaulu!

  • Ah, sì? – rispuse iddhra. – Ce aggiu fare, allora? T’aggiu ricurdare ca già te li primi anni, quannu ne nzurammu, te facisti pigliare pe’ fessa, cchiui te na fiata, te li megliu amici toi? T’aggiu ricurdare comu te futtìane li mpresti li sordi spranti fena a quannu, chianu chianu, te futtera puru tutti quiddhri sani? Ci era lu furbu tannu, tie o iddhri?

  • Eh!… Mo’ sta parli propriu te l’anni te Caùbbe! Poi tire ce boi, ma la sai ca me li futtìane sempre quannu tinìa mieru an corpu! – tisse Mesciu Giuanne. – Ete bonu cu la sai: A mie nu m’ha mai futtutu ceddhri, certu ca sta parlu te quannu stìa an sé ca quannu stìa a mieru… Boh! Ce t’aggiu dire?… Ci ne capìa nienzi?

  • Eh… Già! Ci sape quantu te n’hai biutu, – li critàu intra le ricche la Maria, – ca se pensu a quanti sordi tinii quannu t’aggiu canusciutu… Fra mie e mie tissi: Ete veru, nu bete propriu beddru, ma tene traine, ciucci, acche, massarie e ci ne troa n’auru megliu! An posta me pigliasti pe’ fessa! E però nu m’hai mai tittu te ddhru inìa tuttu ddhru bene te Diu, ca pe’ quanti sordi tinii ci se la pinzà ca te putii squagliare tuttu a mieru?

Mesciu Giuanne la cuardàu seriu seriu, li pigliàu le manu intra le soi e fice sine cu la capu; poi, se azzàu, pigliàu lu saccu ca tinìa mpisu a nu chiou comu na reliquia, quiddhru ca l’ìa servutu fazza ncuddhrare ddhru timoniu te Asterutte, e se sittàu ntorna sutta lu focalire te fronte a muglierasa.

  • Hai ragione Maria! – tisse cu nu surrisu sulli musi. – Chieu tantu su furbu e tantu su fessa, ca pe’ li amici me tagliu tutte e doi le razze e iddhri nu su boni se tagliane pe’ mie mancu n’ugna te le manu loru! Perciò, prima spicciu ntorna tutti li sordi ca m’ane tati li tiauli, tocca cu me n’au an Paratisu, ca ormai m’aggiu fattu ecchiu e tie poti campare ancora quarche annu auru e nu mbogliu te lassu intra li tebbiti.

  • Eh! – fice iddhra facennuse lu segnu te la cruce cu la manu. – Te moi a quannu te n’hai scire issioglia ne passane te anni!

(continua crai o nu giurnu te quisti quai)

LU SCARPARU TE LU TIAULU di Franco Candido

Cap. IX (Parte C)

Luciferu pinsà e rungulà intra te iddhru cu troa na risposta a ddhru misteru ca, alla fine, s’ìa cunsumati li zocculi te crapune a furia cu bàcia annanzi e arretu intra la caverna te aspettu te lu regnu te lu male. Perciò, Asterutte tuzzàu allu purtune cu na telicatezza ca nuddhru tiaulu ìa mai tinuta prima.

  • Patrunu, cercu utienza! – tisse cu la uce ca li trimulà, già rassegnatu allu cchiù peciu te li castichi.

  • Ah, hai rriatu? Finarmente! – se ntise cu na uce putente comu terramotu. – Trasi!… Trasi! Ca m’hai cuntare tuttu!

Asterutte strisciàu cittu cittu annanzi allu capu te tutti li timoni, li zziccàu li zocculi, li mpuggiàu le corne scasciate sull’anche, li cercàu perdunu chiangennu, se chianse ncora, se lamintàu, giuràu ca ìa fattu tuttu lu possibile, ma ca ddhru tannatu te nu Mesciu Giuanne era cchiù furbu te li cchiù furbi te la storia te tutta l’umanità cristiana. Luciferu pe’ prima cosa li tese nu scaffune ca lu fice rimbalzare comu na palla intra tutta la caverna, ma nu cu se la scunta pe’ la figura ca l’ìa fatta fare, ma cchiù tostu cu lu calma per ddhri sigliuzzi tisperati, ca spizzàne lu cuntu te li fatti ca Asterutte sta li facìa e ca iddhru ulìa saccia pe’ filu e pe’ segnu cu se fazza n’idea te la situazione. Capìa, in pratica, ca addhrai ca ìane fallitu li megliu tiauli soi, nu putìa cire ca iddhru stessu, se nu pe’ auru cu fazza bbitire a tutti ca Luciferu era sempre lu capu te tutta la malvagità te lu creatu e ca nu se putìa certamente fare futtire te nu cristianu quarsiasi, mesciu o nu mesciu.

Però, pinsà Luciferu: Se au chieu e me le sona puru a mie, ce fazzu? Se me piglia pe’ fessa puru a mie, quante risate se facune li tannati eterni e tutti li Santi te lu Paratisu? – e se dimmannà te sulu senza riesca decia na risposta cu tegna sensu.

Nu nc’era nienzi te fare! Mesciu Giuanne era nu tipu te omu ca nu ìa mai tinuti simili sulla facce te la terra. Anzi, pinsannu bonu a tutte le cose straordinarie ca ìa fatte cu piglia pe’ fessa li tiauli ca l’ìa mannati iddru, nu nci truà nienzi te straordinariu; in verità, lu Mesciu nu ìa usati poteri magici, né ìa usati miraculi, ìa sulamente tittu: – Settate a ddhra seggia e pigliate lu café! Ane all’ortu e pigliate nu piru! Pigliame lu saccu ca m’ha catutu! – e li tiauli fessi fessi nc’ìane ccappati e ìane ncuddhrati ci alla seggia, ci allu piru e ci allu saccu e pe’ la fessagginità ca ìane fatta bbitire ìane stati mazziciati boni boni e cu na certa ragione. Lu fattu era ca Mesciu Giuanne ìa statu puru gentile cu ddhri scemuniti e nu riuscìa capisca se ddhre ncoddhrature erane dovute a quarche potere ca tinìa iddhru o alla natura te lu Mesciu ca di per se stessa putìa éssire, pe’ quantu ne sapìa, puru soprannaturale.

  • E se stu Mesciu Giuanne ete nu Santu travestitu, chieu ce ne sacciu? E ci me tice ca nu bete n’angilu o n’arcangilu, nu Cherubinu o nu Serafinu, cu la facce te nu fintu fessa, ca ole me fazza niuru niuru cu lu truccu? Comu me cumbinane se me cappane sulu intra quattru pariti e chiamane le sette schiere te angili mazzieri te lu Paratisu? Auru ca le mazzate te Mesciu Giuanne! A mie, se me cappane, me lassane teveru friddu an terra e quiddhru ca nu hane riusciti me fazzane quannu me ne cacciara te lu Paratisu, me potune fare moi cu la scusa te stu Giuanne scatinatu.

Asterutte lu cuardà senza capisca e li misurà li passi cu lu sguardu ogni fiata ca cia e binìa te nanzi lu focalire eternu ca scarfà la spelonca reale.

  • Maestà, sta fiata tocca bai tie! – paria ca dice cu l’occhi basciati pe’ la vergogna ca ìa subita.

  • Maestà ane tie e spaccali l’osse a una a una! Vendicane tutti!

Ma pe’ la verità nu parlà propriu. Te ddhri quattru tienti scangati ca l’ìane rimasti li issìa nu rantulu siccu e scattusu, ca nu significà granché, tantu ca Luciferu, ca ogni tantu lu cuardà rraggiatu, sfiatà te lu nasu, cu ddhr’aliti te focu bollenti e nzulfurati, ca parìa ca ulìa li dica: – Ce boi? Ce te serve ncora? Nu te bastane li cuai ca hai cumbinati? – Ma quiddru, però, nu li ticìa nienzi e cchiui pinzà a ddhra storia strana, ca ìa permessu allu Mesciu Giuanne cu se cuatagna tanti sordi e anni te vita a spese te li tiauli, e cchiui capìa ca nc’era quarche trappula ca sta lu spittà. Perciò, alla fine, tecise ca iddhru sìa fare cchiù furbu te Mesciu Giuanne e pinsàu bonu li proibisca pe’ sempre cu trasa allu nfiernu percene era megliu trasa n’anima te menu alli cumanni soi ca cu li scumpiglia, a n’attimu, quiddhru ca iddhru ìa fabbricatu a tanti millenni, cu n’impegnu ca nu s’ìa mai fermatu, e ca ìa canusciuti sulamente li cchiù cranni successi. Perciò, se decise e lassàu pe’ titteriu pe’ l’eternità, cu Asterutte pe’ testimone, ste parole te focu:

  • Chieu, Luciferu ‘nfernale, caputialu riconosciutu te lu munnu te lu subbra e de lu suttafunnu, cumannante capu te tutte le legioni te li tiauli combattenti in attività e a riposu, aspirante a divinità assoluta e relativa te lu regnu te lu nfiernu e te lu Paratisu, pe’ lu mumentu, dichiaru Mesciu Giuanne “anima persa” pe’ l’oltretomba e ca prima cu pozza trasire allu nfiernu, e a quarsiasi girone te l’anime tannate, s’ha sottomettere a mie e ha firmare le scuse ufficiali an doppia copia a tutti e trete li timoni ca ha struncunisciati sulla terra. Tecretu puru stu tittèriu cu bessa immodificabile pe’ l’eternità e cu bessa scrittu a focu ìu su tutte le porte e li purtuni te lu regnu miu, in motu tale cu resta scolpitu cu fiamma te focu ndelebile.

 

(continua crai o nu giurnu te quisti quai)

LU SCARPARU TE LU TIAULU di Franco Candido

Cap. IX (Parte B)

Puru ca ticìane tantu male te lu nfiernu, Asterutte nu bitìa l’ura se ne torna alla spelonca soa, cu se mina sulla pagliarazza e cu se ndhrizza l’osse ca li tulìane tutte quante, ma nu se fità cu pensa all’aldilà senza se ricorda te patrunusa e de ce lu spittà appena l’ìa tittu ca sta se ne turnà senza l’anima te Mesciu Giuanne. Perciò, tuzzàu allu purtune cu la capu basciata e le ali scuse sutta nu gilè finu finu ca s’ìa futtutu nu se ricurdà mancu addrune. Sperà cu nu se ccòrgane ca ìa turnatu e cu nu decia spiegazioni a ceddhri, ma ci lu itìa caminare cu ddhra facce te cane attutu, cu li musi an terra, senza nu picchi te orgogliu e cu la cuta stracinuni, capìa subitu ce ìa successu e lu dimmannà cchiui cu lu sfutta ca cu saccia la verità.

  • Ce bhai, Asterutte? T’ha struncunisciatu puru a tie? – ticìa nu tiaulu.

  • Eh, fessa! Mo’ ci hai a ddhra Luciferu te conza l’osse! – se la ritìa n’auru.

  • Riògnatene! – li crità quarchetunu auru te retu. – N’hai disonorati a tutti! Riògnatene! –

Lu poru timoniu se scunnìa l’occhi cu le razze, menze rutte, ca l’ìane scasciate li corpi te mazza. Nu se fità mancu li cuarda ddhri tiauli tispittusi ca lu sfuttìane; stracinà li pieti senza cu rispunna facennu na cantilena, sempre simile, ca parìa nu lamentu te tiaulicchiu appena natu.

  • Ihhh!… Ihhh!… – facìa ogni ddo’ minuti – Ihhh!… Ihhh!… – e se ne scinnìa allu nfiernu strisciannu sullu parite te le scale e de le suttascale ca purtàne alli gironi penitenziali cchiù spunnàti te lu munnu nfuocatu te le pene eterne.

Luciferu, però, stìa pinsirusu. A nu primu mumentu, quannu l’ìane tittu ca puru Asterutte sta se ne turnà te sulu, niuru niuru te mazzate e senza l’anima te Mesciu Giuanne, ìa nverdicatu; li capiddhri s’ìane ntisati tutti quanti comu pungiglioni, li mustazzi s’ìane ntustati tritti tritti comu acuceddhre mbilinate e la cuta, ca pe’ abitudine la tinìa nturcigliata a gnommaru a rretu lu panaru, cia e binìa a scattu all’improvvisu, scutulannu l’aria, cu nu sibbilu pungente e fastitiusu ca puru alli tiauli te contornu, ca li stìane sempre appressu, li ntisà lu pilu sulle razze e se uddràne le ricchie cu nu sentane. Poi, mentre sta lu spittà castimannu, comu sulamente sape fare ci lu malessere lu tene ncarnatu intra lu core, ncignàu cu penza intra te iddru.

  • Certu ca ete stranu! Stu furmine te cristianu tene quarche cosa ca nu me convince. Tene na furbizia ca nu ha mai tinuta ceddhri sulla terra. Ha struncuniciati tre tiauli te prima classe ca nu ìane mai canusciuta na sconfitta. Ma comu ha fattu? Quiddhri hane sempre stati tre principi te lu male cchiù sfrenatu ca m’hane chinu lu nfiernu te anime tannate; hane sempre stati tre tiauli tentatori ca hane fatta scola alli cchiù peciu tiscraziati. Basta n’attimu e me li ricordu tutti: Cainu ca ccise fratasa; Erote ca fice ddhru capolavoru te la strage te l’innocenti; lu Tirannu te Siracusa, comu se chiamà? Ah, sì, Tionisu, ca ne ccise a miglionate; Attila ca quannu nu li rimasira cchiui cristiani cu ccia ncignàu cu scuaglia puru l’erva te ddhrai ca passà; li Farisei ca se la pigliara cu Gesù Cristu; Brutu, ca ccise Cesare; Nerone, ca ddumàu Roma cu tutti li romani e Torchemata, ddhru nquisitore ca se critìa ca me brucià le sciare e ca me mannàu tante anime ca se tannàra pe’ le castimite ca minane quannu le torturà, e poi Tracula, ca tinìa l’abitudine cu mpala li nemici, e ci se li scerra sti campioni cu tutte ddhre mitaglie ca s’hane cuatagnate? Eppuru, stu fessa te Mesciu Giuanne l’ha futtuti tutti quanti! Comu ha fattu?

(continua crai o nu giurnu te quisti quai)

LU SCARPARU TE LU TIAULU di Franco Candido

Cap. IX (Parte A)

QUANNU ASTERUTTE TORNAU ALLU NFIERNU

SENZA L’ANIMA TE MESCIU GIUANNE

Pe’ Asterutte lu postu te l’atroce sofferenza nu bera filu lu nfiernu, ma la terra. Anzi, pe’ l’essire, era la casa te Mesciu Giuanne, lu cristianu cchiù timoniu te lu cchiù peciu tiaulu, ca cu nu sorrisu e cu na gentilezza se mascarà te auniceddhru cu te piglia megliu pe’ fessa e quannu t’ìa convintu ca era bonu e pacificu, cu na furbizia te le soi, te ngannà e te tìa tante de ddhre mazzate ca te scuncignà senza rimetiu e senza pietà. E propriu tannu, quannu era ormai troppu tardu, capì ca ddhru squilibrato scatinatu nu bera filu n’auniceddru, ma era furbu comu na urpe te le cchiù furbe urpi e allu stessu tiempu era nu lupu feroce te la cchiù peciu specie ca nu canuscìa pietà. A confrontu sou, lu nfiernu era invece nu postu tranquillu e cautu, tuttu lu contrariu te la terra, e la spelonca soa era nu rifuggiu silenziosu, cu lu focu sempre ddumatu e cu na nferriata, ca se putìa chiutire a doppia chiai, ca puru lu caputiaulu ìa tuzzare se ulìa cu trasa.

Era certu ca quiddhru ca ticìane li antichi nu se putìa necàre; era tuttu veru, nu bete ca se putìa tire all’ammersa. Lu nfiernu era lu regnu te lu casticu, fattu amposta cu pacane le pene l’ommini cchiù farabutti e cruteli te la terra, dopu ca se ne cìane all’oltretomba. Lu re te stu carcire sprufunnatu era Luciferu e li ciutici ca ìane sempre ciuticati li peccatori ca nu putìane cire né an Paratisu, né an Purgatoriu, se chiamàne Pensaroth, Belzebù e Albigorre, ca erane principi assoluti te lu male; invece, Setteranfe, Mefistofele e puru iddru, ìniane subito dopu sti’ personaggi leggendari, ca ìane fatta la storia te lu munnu te lu suttaterra, comu tiauli te prima fascia, ma sempre rivali, ca cercàne cu se fazzane sgambetti unu l’auru, cu calunnie e malevolenze varie, pe’ l’invidia ca se li mangià, ca tutti ulìane se ccogliane li favori te lu timoniu principe, pe’ ddhra carica te viceré te l’inferi ca Satanassu ìa sempre promessa, ma mai ìa concessa.

Quannu parlàne te stu terrificante regnu te li timoni, l’antichi ticìane ca era lu postu cchiù cautu ca nc’era, nu furnu te aria nfucata e faugnusa, chinu te vapori bollenti te nzurfu e te lacchi te acque sause, ca priparàne fiumi te focu ardente, cateratte te lava ncandescente e te mostri a sette capu, cu sette ucche e sette lingue, chine te spine, e cu certi tienti ca muzzicàne le anime te li tannati ca se lamintàne ogni ddo’ secondi pe’ le pene ca ìane suppurtare. Ticìane ca lu purtune te stu munnu scunfunnatu stìa alla fine te l’oceanu, dopu le culonne te Ercule, ddhru fanfarone ca se vantà ca putìa distruggire tutta l’umanità cu na sula manu, fena a quannu ippe la furtuna se atta cu Setteranfe, lu tiaulu te battaglia te Luciferu, ca te lu scuscinau te mazzate bonu bonu. Certu ca ddhru furmine te Ercule era teveru fastidiusu, cu ddhra storia ca era nu menzu Diu e ca ìa dirittu a nu trattamentu te favore. Iti tie, ca puru ca n’ìa pigliate tante, ca era cchiù mortu ca bbiu, quannu ne lu nùssira uzzi uzzi allu primu girone, intra alla Spelonca te la Notte, bicìane se turmennu se rianima, ippe lu curaggiu se lamenta pe’ li spifferi te aria bollente ca nu lu facìane turmire e poi, quannu ne lu purtàra alla Spelonca te lu Sonnu, allu secondu girone, tuccàu lu ccuttentane ntorna, ca sta facìa lu tialu a quattru, ca nc’era troppu silenziu e nu se fità cu dorma mancu addhrai. Ce aggiu dire te cchiui? Ddhra storia ìa dintata la barzelletta te tutti l’inferi, ca ceddhri lu mantinìa cchiui e perciò ne lu purtàra alla Spelonca te li Sogni senza nuddhru effettu e alla fine, itennu ca stìa sempre comu li pacci, lu purtàra alla Spelonca te le Furie e addhrai lu lassàra cu se la icìa cu Cerberu, lu timoniu cu tre capu, e ca era l’unico, cchiù tostu te iddru, ca lu putìa suppurtare.

(continua crai o nu giurnu te quisti quai)