LU SCARPARU TE LU TIAULU di Franco Candido

Cap. XVI (Parte D)

QUANNU MESCIU GIUANNE DINTAU SANTU

  • San Giuanne, protettore te li scarpari? – rispuse San Pietru facennuse la cruce. – Cine? Quiddhru? Santu Paulu, me meraviglu! Ce sta te fita, la capu? E chieu ca t’aggiu cercatu cunsigliu propriu a tie!

Lu Signore azzàu la manu e li fice segnu cu se setta e cu nu fazza questioni.

  • San Pietru, – tisse cu cranne saggezza – nu fare lu pìulu! Ca sta questione l’imu sistemare na fiata pe’ tutte! San Giuanne, protettore te li scarpari, tice lu Consigliu? E San Giuanne sia, te moi e pe’ l’eternità! Quiddhru ca è dittu è dittu!

  • No, no, gnernò! – tisse a ddhru puntu Mesciu Giuanne ca s’ìa statu cittu cittu bìcia ce ne issìa te lu Cunsigliu. – No, no! Chieu nu su d’accordu!

  • Comu nu si d’accordu! – critàu San Pietru largannu le razze, ca ìa persa la pacienzia. – Comu te permetti? Allu Signore nu poi tire te none, nu la sai?

  • Sine, la sacciu! Ma lu fattu ete ca se aggiu dintare santu e protettore te li scarpari pe’ l’eternità, ci sape quanta fatìa me tocca fazzu! Ma tie li canusci li scarpari? Sai te ci sta parli? Quiddhra ete gente ca nu ne face mai una tritta, face tuttu alla bona, tocca li hai te retu a retu li giusti le cose ca sconzane e quiddhre ca secondu iddhri mestune, ma pe’ li cristiani te carbu, nu su filu bone; anzi, su proriu sconclusionate. Ca se no, scarpari li chiamàne? Li scarpari? Belle pezze!

  • Su l’unici ca nu tenune protettore! – tisse San Pietru.

  • Ca la sacciu! Ci ete tantu fessa denta santu te li scarpari? Ceddhri! Ca se no senza santu pe’ tantu tiempu ìane rimasti? E ui uliti me li ncuzzittati propriu a mie!

  • Se oi cussì bete, se no nienzi! Diversamente, an Paratisu nu poi trasire!

  • Ah sì? Allora sai ce facimu? Chieu fazzu lu Santu te li scarpari, ma ui miti dare la paca!

  • La paca? – critara tutti li santi. – Hai mpacciutu? Ce paca e paca!

  • Sine, la paca! – tisse mesciu Giuanne. – Se no comu le fazzu le opere te bene?

  • Ma ce dici! – tisse San Pietru spacinziatu.

  • Auramente ca no, – fice ntorna iddhru, cuardannu versu lu puntu cchiù bautu te lu Cunsigliu, versu la giustizia somma, la verità infinita, – Bon Gesù, invece te lu stipendiu, concedime tre grazie, comu facisti sulla terra e chieu, umilmente, me rassegnu alla volontà toa e de tutti li Santi te lu Paratisu.

A stu puntu, lu Signore, se azzàu, scise quarche scalune, e disse seriu seriu:

  • Eh no, Mesciu Giuanne, e mo’ si fessa! Bon Gesù, Bon gesù, me futtisti na fiata e mo nu me futti chiù! San Giuanne, protettore te li scarpari t’ane tittu faci e quiddhru hai fare, cu la paca o senza!

  • Ma Signore… – tisse San Pietru sorpresu, cutulannu la capu. – quiddhru santu?

  • E ce ma e ma… Caru San Pietru miu! Tatili lu titulu, tatili la paca, tatili ce bole, ma pe’ carità nu faciti li tau le tre grazie, ca se no quiddhru, alla fine, ete capace cu me futta lu postu puru a mie!

Cussì foi ca lu scarparu te lu tiaulu trasìu pe’ sempre an Paratisu e dintau Santu, protettore te ci face le cose alla bona e senza minta fine. E perciò, te tannu a moi, ci ole fazza quarche cosa te bonu intra la vita, se nu l’ha fatta mai, a iddhru tocca se rivolga, cu lu prea e cu ncigna ogni prechiera cu ddhre parole ca ìane fattu trasire lu cchiù cranne scarparu te li scarpari an Paratisu:

  • San Giuanne miu, protettore te li scarpari, tre grazie ulìa, cu nci ncoddhrane alla seggia, allu saccu e allu piru, ca sulamente la crazia toa me tae suspiru!

(Lu cuntu ha spicciatu. Uliti bu ne cuntu n’auru? Crai, forsi. Ci le sape le vie te lu Signore?)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s