LU SCARPARU TE LU TIAULU di Franco Candido

Cap. XVI (Parte C)

QUANNU MESCIU GIUANNE DINTAU SANTU

Critàu nu giurnu tuttu acitatu Mesciu Giuanne. Tutti quanti se girara e bittira ca st’anima, cu duma lu focu, ìa misi prima li taccari, te subbra li taccari ìa mise le leune e subbra le leune ìa misa la paglia. Ete cosa ca ae cu sé, ogni fiata ca dumà la paglia, quiddhra ardìa nu picchi e se cunsumà senza cu riesca cu duma lu focu, ma dhr’anima, comu sia ca nienzi era, continuà sempre allu stessu motu: mintìa prima li taccari, poi le leune e poi la paglia, senza capisca ca cussine nu putìa mai dumare.

  • Mmmm! Mmmm! Mmmmmmmm! Mmmmmmmmmmmmmm! Ssspppiiissshhh!

Fice iddhru cu li fazza capire a ddhru sbaglià. Pe’ ordine te lu Signore, Mesciu Giuanne, nu putìa parlare e perciò cercà se fazza capire cu li gesti e cu li: “Mmmm! Mmmm!”, ma senza nuddhru effettu.

  • Mmmm! – fice ntorna, musciannu cu la manu ca la paglia ìa scire te sutta.

  • Mmmm! Mmmm! – fice te nou, unennu tutte e doi le manu, cu li fazza capire ca le leune ìane binire subitu dopu la paglia.

  • Mmmm! Mmmm! Mmmmmmmm! – fice li moscia a ddhru ìane scire li taccari.

  • Mmmmmmmmmmmmmm! Ssspppiiissshhh! – fice alla fine li fazza capire ca ìa ddumare lu posparu te sutta la paglia cu piglia bonu lu focu.

Ma quiddhru nienzi, nu capìa e nu capìa. San Pietru nu sapìa cchiui comu l’ìa cumbinare; te na parte, nc’era dhr’anima ca, nu nc’era nienzi te fare, era propriu babbata; te l’aura, nc’era Mesciu Giuanne ca parìa nu pacciu, a furia cu fazza mmosse cu le razze cu li fazza capire comu ìa fare.

  • Mesciu Giuanne! – li critàu cu bicia se la spiccia, ca la prucissione te anime s’ìa fermata cu cuardane tutti e doi e perciò s’ìa fermatu lu trafficu. – Nu mboi la spicci, ah? T’aggiu tittu ca le anime l’hai lassare stare qualsiasi cosa succede, ma tie te ne futti te tuttu!

  • Ma nu biti ca quistu sta dae spettaculu pe quiddhru ca sta cumbina. Ce sa dire ca an Paratisu trasune puru li babbati? Cussì a ddhru cià spicciamu? Nci ole puru nu picchi te riesciu.

  • T’aggiu tittu centu fiate: Quiddhru ca iti iti e quiddhru ca sienti sienti! Se oi denti santu, quistu hai fare. Nci ole penitenza e mortificazione, ncora l’hai capire?

  • Eh, ma chieu cussì su fattu. Ci me ole tocca me piglia cussi comu suntu! Le cose storte chieu nu le possu propriu bitire.

San Pietru ciu se setta allu postu sou cu Santa Pacienzia largannu le razze. Mesciu Giuanne era l’unica anima ca ne lu facia cire fore te capu e ca nu lu facìa ragionare. Perciò, quannu itte ca ddhru spiritu inquietu ìa dire la soa su tutti quiddhri ca trasìane te la Santa Porta, capìu ca nu putìa stare an Paratisu senza se stecìa cittu e ca perciò, cu lu tegna mpegnatu, l’ìa truare an forza quarche cosa te fare. Però, nu sapìa propriu comu l’ìa cumbinare percé lu Signore l’ìa tittu ca quiddhru ìa béssire lu postu sou e perciò tinìa le manu ttaccate. Comunque, alla fine, se decise, li cuntàu lu fattu a Santu Paulu e tutti doi convocara la riunione te lu Consigliu te li Tutici Apostuli, l’organu supremu te lu Paratisu ca inìa dopu sulamente te la Trinità. Cussì, alla presenza te l’Onniputente, San Pietru fice lu resucontu te ce ìa cumbinatu Mesciu Giuanne an terra e an Paratisu e alla fine tisse:

  • Pe’ recula, cu stecia a quai, quistu l’emmu fare Santu e protettore te quarchetunu, ma vistu e consideratu quiddhru c’ha cumbinatu an vita e puru an morte, cu ce curaggiu lu facimu santu e soccorritore te li afflitti? Signore, chieu me rimettu alla clemenza toa. Sulamente tie sai ce s’ha fare!

Santu Paulu, ca nu pe’ nienzi ete unu te li cchiù importanti Santi te la Chiesia, azzàu la manu e chiese la parola.

  • Vistu ca ete scarparu e ha fattu sempre lu scarparu, secondu mie ete bonu piglia la nomina te “San Giuanne, protettore te li scarpari”, giacché se ha riuscitu li fazza le scarpe puru allu tiaulu, ae cu sé ca comu sape fare le scarpe iddhru nu le sape fare ceddhri!”

  • Me pare n’opinione santa! – tisse lu Signore.

(continua crai o nu giurnu te quisti quai)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s