LU SCARPARU TE LU TIAULU di Franco Candido

Cap. XI (Parte D)

 

  • Sine! Sine! – rispuse iddru. – Eccomu! Eh, dimme na cosa: Ma deveru stu scazzamurieddhru tou pote fare quarsiasi cosa ca li dici?
  • Nah! Ce te pare ca sta scherzu? Timme, ce desideriu tieni moi? Propriu a stu momentu? Pe’ casu, giustu ca stamu an taula, ulii nu picchi te carne rrustuta, macari te porcu, già pronta e cucinata?

  • Era bonu! – rispuse iddru. – Ca muglierama non ne face mai ca tice ca li ncrisce cu se rrusta annanzi lu focu insieme alla carne.

  • Beh, allora ogni fiata ca lu scazzamurieddhru t’ha fare nu desideriu tocca prima li mpizzi nu cauce te preavvisu e poi cu dici ste parole: Scazzamurieddhru te suttafunnu, nu piacere o te sprufunnu, ddo’ piatti te carne te porcu allu cchiù prestu, moi m’hai fare issire lestu! – e poi li mpizzi n’auru cauce pe’ rincraziamentu, cussì, nah! – Mpizzai n’auru cauce allu saccu e le cose a ddhra intra ficira ntorna nu bellu rumore te scasciatu.

  • Beh! – tisse lu massaru. – E lu porcu a ddhru stae? Non viciu nienzi!

Allora, tiesi n’auru cauce allu saccu e nfilai ntorna la centra intra lu bucu e l’uccieri a ddhra puntu critàu: – Aaahhhiii! Intru lu furnu stae! Intru lu furnu!

  • Ntonietta! – Tisse lu massaru. – Vidi intra lu furnu! Mmanisciate! Vidi se ave lu porcu!

Muglierasa ntassàu, me cuardàu storta, trimulannu comu na canna, e tisse:

  • Maritu miu, possibile ca criti a quiddhru ca tice stu’ fessa? Pote mai esistere lu scazzamurieddru? Quiddhre tutte chiacchiere pe’ li babbati te paise suntu!

  • Beh, – rispuse iddru, – de quai a belvedere ce pocu. Apri lu furnu e vidi se ave lu porcu!

La Ntonietta cutulàu la capu te tritta a mancina, ca sapìa ca lu porcu rustutu nc’era te veru intra lu furnu e ca n’auru porcu, mutu cchiù biu, stìa puru intra la mattrabanca. Perciò, cu nu fazza scoprire ci nc’era a ddhra intra, aprìu lu furnu e finse la cchiù cranne meraviglia:

  • Nah! Cose te pacci! Deveru carne rustuta te porcu ave!

  • Vitisti? Vitisti ce bete forte stu scazzamurieddru? Nnucila! Nnucila ca ne la mangiamu!

E iddhra nnusse li ddo’ piatti ca arduràne te lu largu e ne li mangiammu propriu te custu. Lu massaru se stuciàu li musi alla tuaglia e tisse:

  • Peccatu ca non ave nu picca te vinu, ca oramai l’imu spicciatu. Noh, Ntonietta?

  • Sine! Non ave vinu cchiui!

  • E ce problema nc’ete? Ce boi nu buttiglione te mieru, pe’ casu? Nah, basta ne la ticu allu scazzamurieddhru miu e beccute e fattu! – Tiesi nu cauce allu saccu e dissi:

  • Scazzamurieddhru te suttafunnu, nu piacere o te sprufunnu, nu buttiglione te mieru allu cchiù prestu, moi m’hai fare issire lestu! – ncarrài ntorna la centra intra lu craottu te la mattrabanca e quiddhru critàu:

  • Intru la capasa! Guarda intru la capasa! A ddr’intru l’ave!

Lu massaru tisse a muglierasa: – Mmanisciate, Ntonietta! Apri la capasa e vidi se ave lu vinu!

  • Ma ce voi cu aggìa a ddr’intru? Friseddhre ave e basta! Non sai? – rispuse iddhra sperannu cu la cricia.

  • Beh! Pote éssire, ma tie cuarda lo stessu se l’ave!

La Ntonietta calàu la capu e aprìu la capasa e ntorna se meravigliau:

  • Nah! Non è possibile! – critàu. – Nu buttiglione te vinu ave!

  • Vitisti? E tie ca dicivi ca allu scazzamurieddhru critene li babbati! Portalu ca ne lu bivimu. Portalu!

(continua crai o nu giurnu te quisti quai)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s