LU SCARPARU TE LU TIAULU di Franco candido

Cap IV (Parte C)

  • E… T’ìa dire n’aura cosa… – tisse ntorna Mefistofele cu nu filu te uce e suspirannu. – Te stizzi se te la ticu?

  • E comu m’aggiu stizzare cchiui te quantu stau? – rimbombau lu capu te li tiauli muzzicannuse la cuta per la raggia. – Timme! Ce aggiu suppurtare ancora? Ce nu m’hai tittu?

  • Lu fattu ete ca… Sta me ne tìa tante, no! Ca chieu, cu me lassa stare, l’aggiu tittu ca li tìa teice anni auri te vita e tanti sordi quanti ne li servìane, cu fazza festa ogni giurnu, pe’ quantu ole iddhru stessu. E quiddhru ha buluta la firma mia sullu contrattu, e puru an doppia copia, ca nu putimu mancu tire cchiui ca ete fausu!

  • Tiscraziatu ca nu sinti auru! T’ha sciucatu bonu bonu comu lu fessa cchiù fessa! E chieu me critìa ca eri lu megliu! An doppia copia l’hai firmatu? Poru a mie! Ce ficura! Ci sape comu sta se la ritune an Paratisu l’arcangelu Michele e tutti l’auri Santi! Ma sinti sicuru ca nu se pote fare nienzi cchiui?

  • Sine! Cuarda, nah! La firma soa e la mia staune scritte chiare chiare, una te coste all’aura sullu quaternu russu ca me tiesti! Nah! Pigliatelu ntorna!

  • Affanculu tie e lu quaternu russu, ca nu mbogliu mancu lu iciu chiui! Abbatine! Abba minalu intra lu focu eternu cu se brucia! – critàu luciferu mentre ne lu tirà sulle corne. E mo’ perdite te nanzi all’occhi mei e bba chiamame Setteranfe qua quiddhru ete nu tiaulu ca l’anime nu se le face scappare filu, cu l’artigli ca tene. Fra deice anni mannu iddhru li piglia l’anima a Mesciu Giuanne, ca tie sinti bonu si e no cu pulizzi le spelonche nfernali te la matina alla sira! Sparisci! Perdite!

(continua crai)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s