LU SCARPARU TE LU TIAULU di Franco Candido

Cap 1 (Parte H)

  • Beh! – fice lu Signore. – Ma quista ete na fissazione, allora! Ancora cu nci ncoddhrane oi? Mah!… Nu me pari giustu! Comunque, se cussì boi! Se a stu saccu nci tieni propriu tantu… Va bene, te sia concessa puru quista! Mo’ nu te ne curare, ca s’ha fattu tardu e nimu scire!

  • Grazie Signore! Grazie te la infinità bontà ca tieni! – fice lu Mesciu nginucchiannuse fena a nterra.

San Pietru, se passàu le manu an facce cu se fricula l’occhi senza se fazza bitire, tanta era la raggia pe’ ddhru sprecu te grazie ca ìa fatta ddhru cristianu senza cervieddhru. E, intra te iddhru, pinsàu:

– Nu ha mai successu a tutta la storia te l’umanità cu nu li cercane la crazia te l’anima allu Signore, ma stu Mesciu Giuanne ha superatu ogni limite! Eppuru ne l’aggiu titta, m’aggiu raccumannatu, ma sciroccu! Sia ca aggiu parlatu allu chientu!

  • Chieu ticu: l’hai cercate tutte ste grazie e quiddhra te l’anima nu ne l’hai cercata. Mo’ quannu mori hai dhrittu allu nfiernu e tannu itimu ce faci! – li tisse intra li tienti lu purtinaru te lu Paratisu.

  • Beh, va bene! Pe’ moi l’aggiu cercate quiste! – rispuse Mesciu Giuanne, largannu le razze. Te moi a tannu!… Poi, quannu me n’au all’auru munnu se pensa!

  • Ma cuarda quai ce fessa stu Mesciu Giuanne! – tisse ntorna San Pietru mentre se ne turnà an Paradisu cu lu Signore. – Lu Maestru li tae none una, ma tre grazie e quiddhru ddhrai, invece te la crazia te l’anima, ae li cerca le grazie cu ncoddhrane li cristiani allu saccu, allu piru e alla seggia. Nun nci pozzu ancora critire! Cose te pacci! Nu bbete cosa. Quistu propriu nu me la cunta giusta. Nu bbete possibile bessa cussì fessa!

    (Continua crai)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s